http://www.ktrk.kg/Ысык-Ата районунан кыз ала качууга шектелип төрт бала кармалды

Ысык-Ата районунан кыз ала качууга шектелип төрт бала кармалды

21 Окт , 16:46 283

Эгерде текстте ката тапсаңыз, белгилеп Ctrl+Enter басыңыз

19-октябрь күнү болжол менен саат 11:28 чамаларында Ысык-Ата РИИБдүн нөөмөт бөлүмүнө телефон чалуу болуп, Киргшелк айылынан 2003-жылы туулган кызды белгисиз бирөөлөр алып качып кеткендиги тууралуу маалымат келип түшкөн. Бул маалыматтын негизинде окуя болгон жерге дароо Ысык-Ата РИИБдүн ыкчам тергөө тобу чыгышкан.

Аталган факты кылмыштардын жана жоруктардын бирдиктүү реестрине Жазык кодексинин 175-беренеси (Адамды никеге туруу максатында уурдоо) боюнча катталып, сотко чейинки өндүрүш иштери башталган. Милиция кызматкерлери тарабынан жүргүзүлгөн ыкчам издөө иш-чаралардын натыйжасында жогорудагы кыз Токмок шаарындагы үйлөрдүн бирине алып барылгандыгы такталып, кыз ала качууга шектелип, 1998-жылы туулган С.А., 1991-жылы туулган Т.М., 1999-жылы туулган Т.К. жана С.М. аттуу балдар кармалышкан.

Алдын ала маалыматтар боюнча, үстүбүздөгү жылдын 17-октябрь күнү жогорудагы кыз курбу кызынын үлпөт тоюнда ала качкан балдардын бири менен таанышып калган. Кийин ал бала кыздын макулдугу жок алып качып кеткени маалым болгон. Милиция кызматкерлери тарабынан кыз ата-энесине кайтарылып берилген, ал эми шектүүлөр убактылуу кармоочу жайга камакка алынган. Сотко чейинки өндүрүш иштери улантылууда.

Новости по дате