http://www.ktrk.kg/Өлкөнүн алдыңкы студенттери президенттик стипендияга ээ болушту

Өлкөнүн алдыңкы студенттери президенттик стипендияга ээ болушту

25 Дек 2018 , 22:55 1229

Эгерде текстте ката тапсаңыз, белгилеп Ctrl+Enter басыңыз

Окуудагы жана коомдук иштердеги жетишкендиктери үчүн жалпы республика аймагындагы жогорку окуу жайлардан 70ке жакын студент президенттик стипендияга ээ болушту. Сыйлык ээлерин бүгүн Президент Сооронбай Жээнбеков куттуктап, өлкө башчысы акыркы кезде мамлекет билим берүү тармагына өзгөчө көңүл буруп, каржылоону көбөйтүү, билим сапатын жакшыртууга чоң күч аракеттер жумшалып жатканын белгиледи. Президенттик стипендия мыкты окуган жана шыктуу жаштарга каржылык көмөк көрсөтүү максатында тапшырылып келет.

Жанара Жаркынбай кызы Ош мамлекеттик университетинин медицина факультетинде билим алат. Дарыгерлик оңой кесип эмес дейт ал, күнү- түнү окуу, дайым изденүүнүн үстүндө жүрүү медиктерге таандык нерсе. Ал бүгүн президенттик стипендияга ээ болуп отурат. Жанара талыкпаган эмгек жана кесибиңди сүйө билүү гана ийгиликтерге жеткирерин дагы бир жолу далилдеди.
Врач болуу оор, бир ката бир адамдын омуру, ал учун куну туну окуш керек. жаны нерсени изденуу менен отот. Эмне учун тандадым, кичинемен эле кыялым болчу. 
Президенттин колунан стипендия алгандардын дагы бири Илья Зыков. Ал Исхак Раззаков атындагы Техникалык университеттин 4-курсунун студенти. Коомдук тамак-аш боюнча технолог. Бул кесипти кичине кезинен эле кыялданган.

Өлкө башчысы президенттик стипендияны 69 студентке тапшырды. Алар республика аймагындагы 38 жогорку окуу жайынан тандалып алынган. Алар түрдүү тармактардын- мугалим, дарыгер, программист, юрист, курулуш, транспорт жана башка бир катар адистиктердин ээлери. 

Мен үчүн президенттин стипендиясы күн сайын мыкты болууга, келечек максаттарымды ишке ашырууга дем күч болот. Ар бир сыйлык ээси бул үчүн чоң күч аракетин жумшады болуш керек, анткени президенттин стипендиясына ээ болуу оңой олтоң иш эмес. Келечекте медицина тармагына жана жалпы өлкөнүн өнүгүшүнө салымымды кошкум келет.
Өлкө башчысы өз сөзүндө мамлекетибиздин дүйнө коомчулугунун алдыңкы сабында болушу үчүн эң башкы роль билимдүү жана кесипкөй жаштарга таандык экенин баса белгиледи. 

Президент Кыргызстандын өнүгүшү үчүн билим негизги ресурс катары бааланып, билим чөйрөсү мамлекеттик бюджеттен артыкчылыктуу багыт катары каржыланаарын белгиледи. Мындан сырткары билим сапатын көтөрүүгө бардык күч аракет жумшалмакчы. Өз кезегинде стипендия ээлери, өлкө башчынын колунан сыйлык алуу алар үчүн чоң дем күч экенин белгилешип, келечекте Кыргызстандын өнүгүшүнө чоң салым кошууга даяр экендиктерин билдиришти.
Президенттик стипендияга жалпы 210 студенттин талапкерлиги келип түшкөн. Алардын ичинен 69ун мамлекеттик органдардын жана жарандык коомдун өкүлдөрүнөн түзүлгөн жумушчу топ тандап алды. Билим берүү министри окуудагы мыкты көрсөткүчтөргө жетишип жаткандардын саны жыл сайын өсүп жатканын белгиледи. 

Стипендиаттарга мактоо баракчасы жана 50 миң сом өлчөмүндөгү стипендия тапшырылды. Президенттик стипендия жыл сайын мыкты окуган жана шыктуу студенттерди колдоо максатында тапшырылып келет.


Новости по дате