http://www.ktrk.kg/Каракол лыжа базасы быйыл дагы мыкты жайлардын катарында

Каракол лыжа базасы быйыл дагы мыкты жайлардын катарында

27 Дек 2018 , 0:16 1170

Эгерде текстте ката тапсаңыз, белгилеп Ctrl+Enter басыңыз

Кыргызстандын 90 пайызга жакын аймагын тоолор ээлейт. Буга байланыштуу өлкөнүн кышкы туризмге болгон дараметин пайдаланып, бул мезгилде дүйнө жүзүнөн туристтерди тартуу маанилүү. Бүгүнкү күндө өлкөдө 23 тоо лыжа базасы иштейт. Былтыр Каракол КМШ өлкөлөрү арасында алдыңкы 10 тоо лыжасы эс алуу жайынын катарына кирген. Бул тууралуу Россиянын "ТурСтат" аналитикалык агенттиги кабарлаган. 3-Аталган агенттик быйыл дагы КМШ аймагында кышкы эс алууга ыңгайлуу тоо лыжа базаларын аныктаган. Анда Каракол лыжа базасы 6-орунду ээлеген.

Россиялык "ТурСтат" аналитикалык агенттигинин маалыматына ылайык, кышында КМШ жана жакынкы чет мамлекеттерде эс алууну каалаган россиялыктардын саны былтыркыга салыштырмалуу 15 пайызга көбөйгөн. Демек Кыргызстандын, анын ичинде Караколдо эс алууну, кышкы каникул күндөрүн өткөрүүнү каалагандар быйыл абдан көп болушу мүмкүн. Келе турган туристтер үчүн кар дагы калың жаап, кубандырды. Жаңы-жылды утурлай Кыргызстандын булуң бурчунан келген ички туристтердин агымы да көп болууда.

Дүйнөгө аты белгилүү "Passion Passport" коому Кыргызстанды 2018-жылдын мыкты туристтик аймактарынын катарына кошту. 20 мыкты туристтик аймактын ичинен Дания королдугуна караган Фарер аралы тизмеде биринчи. Андан соң Пакистан, Иран, Сингапур жана Норвегиянын Лофотен аралы аталган. Борбор Азия өлкөлөрүнүн ичинен тизмеге Кыргызстан гана кирип, 18-орунду ээлеген. 2016-жылы "Forbes" журналы Кыргызстанды 2017-жылдагы эң арзан эс алуучу өлкөлөрдүн тизмесине киргизген. Аталган журналдын рейтингинде жалпысынан 21 өлкөнүн эс алуу баалары каралып, саякаттоого эң үнөмдүү өлкө болуп Вьетнамдын курорттору аталса, Кыргызстан экинчи орунду ээлеген. Бизге жеткен маалыматтар боюнча азыр Каракол шаарындагы жүзгө жакын конок үйлөрүнүн токсон пайызы келе жаткан январь айына карата толук алдын ала ээленген. Тоо лыжа базасына жакын жерде котедждер шаарчасы быйыл курулуп бүттү. Бул аракеттердин баары кышкы туризмди өнүктүрүүгө жасалган кадамдар.



Новости по дате