http://www.ktrk.kg/Кыргызстанда балдар онкологиясы боюнча көйгөйлөр курч бойдон

Кыргызстанда балдар онкологиясы боюнча көйгөйлөр курч бойдон

15 Фев , 20:48 607

Эгерде текстте ката тапсаңыз, белгилеп Ctrl+Enter басыңыз

Кыргызстанда балдар онкологиясы боюнча көйгөйлөр курч бойдон. Дарыгерлер бул дартка чалдыккандардын саны күндөн күнгө көбөйүп жатканын айтышат. Бүгүн балдар онкологиясы бөлүмүндө дарыланып жаткан балдардын көңүлүн көтөрүү үчүн атайын оюн-зооктор уюштурулду.

Эки жаштагы кичинекей Уулбүбүнун ооруп калганына 5 айдын жүзү болду. Боорундагы шишиги азайып калганда ага операция жасалат. Беш күндөн бери химиялык терапия алып жаткандыктан абалы алсыз. Онкологиялык оорулар - өтө тез өөрчүп кетүүчү оор дарттардан болуп саналат . Эгер аларды жоопкерчилик менен тез дарыласа, толук айыгып кетүүгө болоорун айтат дарыгерлер.

Учурда Улуттук онкологиядагы Балдар онкологиясы жана гематология бөлүмүндө ымыркайлардан тартып 18 жашка чейинки 40 бала дарыланууда. Алсыз, жардамга муктаж бөбөктөр бул жайда айыгып кеткенче болушат. Кай бирлери жарым жыл жатса, айрымдары 3-4 жылдап дарыланат. Мындан жыйырма жыл мурда рак менен ооруган балдардын көбү жашоосун уланта албай калчу. Ал эми азыр алардын 70-80 пайызы толук сакайып кетүүдө. Жаш балдардын организми дарыларга карата сезимтал болуп, тез калыбына келет. Андыктан ооруп калган балдарын ата-энелер өз учурунда дарыгерлерге алып барса, бул илдеттен айыгуу мүмкүнчүлүгү ошончо жогору болот.

Расмий маалымат боюнча, учурда Улуттук онкология борборунда залалдуу шишик оорулары менен жабыркаган үч миңден ашуун бала бар. Алардын сакайып,калыбына келишине кайдыгер эмес адамдар да арбын. Оору менен күрөшүп жаткан бөбөктөрдү алаксытып, оорусун унуткаруу үчүн кайрымдуулук уюмдары тарабынан ар кандай оюн-зооктор уюштурулуп, түрдүү белектер берилип турат.

Новости по дате