http://www.ktrk.kg/Абылгазиев: "Долбоорлорду ишке ашырууда сапаттуу даярдоо маанилүү"

Абылгазиев: "Долбоорлорду ишке ашырууда сапаттуу даярдоо маанилүү"

5 Дек 2019 , 14:07 775

Эгерде текстте ката тапсаңыз, белгилеп Ctrl+Enter басыңыз

Долбоорлорду ишке ашырууда аларды сапаттуу даярдоо маанилүү роль ойнойт. Бул тууралуу Фискалдык жана инвестициялык саясат боюнча кеңеште Премьер-министр Мухаммедкалый Абылгазиев айтты. Кеңеш эл аралык финансы институттардын эсебинен ишке ашырылып жаткан 4 долбоорду карады. Алардын ичинде Ош, Каракол шаарларын жана Нарын облусунун 30дан ашуун айылын суу менен камсыздоонун жеткиликтүүлүгүн жана сапатын жакшыртуунун алкагында объекттерди реконструкциялоо жана калыбына келтирүү боюнча долбоорлор жактырылды. 

Азия өнүктүрүү банкы тарабынан каржыланган долбоордун баасы 10 млн. доллар. «Калкты суу менен камсыздоону жакшыртуу - өлкө Президентинин артыкчылыктуу программаларынын бири. 2023-жылга карата өлкөнүн калк жашаган жерлерде ичүүчү таза суу көйгөйүн жоюуга тийишпиз. Бирок бул иш кайра 2-3 жылдан кийин оңдоого муктаж болбой, сапаттуу аткарылышы кажет», - деди Мухаммедкалый Абылгазиев. Муну менен бирге Өкмөт башчы бир нече объектти текшерет, анын сапаты боюнча тиешелүү мекеменин кызматкерлеринин ишине баа берилет.

«Тигил же бул долбоорлорду иштеп чыгууда жооптуу адамдар тарабынан комплекстүү мамиле жок. Бир нече жылда аягына чыга турган долбоорлор 5 жылдан ашык убакытка созулуп жатат. Долбоордук-сметалык документация даяр эмес, а бирок ратификациянын маанилүүлүгү каралып жаткан учурлар кездешет. Бардыгын эрежеси менен жасаган учурлар бар. Бирок кийин 2-3 жыл мурда бүткөн объекттер өз убагында сапатсыз аткарылган иштин айынан кайра каражат салууну талап кылып жатканы анык болот», - деп белгиледи Премьер-министр.

Новости по дате